Ang "Fisherman's Paella"

Nakatikim ka na ba ng masarap na paella? Hilig mo ba ang mga pagkaing-dagat o kung tawagin natin ay seafoods? Kung oo, tiyak kong magkakasundo tayo. Marinig ko pa lamang ito, nagkakaroon na ng matamis na ngiti sa aking labi. Kilalang-kilala na sa atin ang paella o ang valensyana. Alam na alam natin ito sa kakaiba nitong kulay at sarap. Nagmula man ito sa bansang Espanya, humahawak ito ng espesyal na lugar sa puso ng mga Pilipino. Marami man ang maaaring gawing luto dito, iisa lamang nakakuha ng aking pansin, ang Paella Marinera.

Ang Paella Marinera ay isang klase ng luto ng paella na hinaluan ng iba’t-ibang mga sariwang pagkaing-dagat. Ito  ay tinatawag ding “Fisherman’s Paella”. Tiyak namang napakasayang maghanda ng isang Paella Marinera dahil maaari kang mageksperimento depende sa iyong kagustuhan. Wala itong istandard na recipe, bawat rehiyon at mga indibidwal ay may iba-ibang taktika sa pagluto nito. Ang mga sangkap nito ay seafoods tulad ng hipon, tahong, pusit at kabya. Maaari rin itong samahan ng kaunting manok. Mahalaga ang kanin o bigas sa lutuing ito. Kinakailangan rin ng sibuyas, siling pula, at tomato sauce o tomato paste upang maging perpekto ang lasa. Maaari pang magbago ang mga bagay na ito depende sa gusto ng taong nagluluto. Tamang-tama lamang ang lasa nito. Matitikman mo ang halong tamis, asim at alat sa pagkain nito. Lumulutang din ang lasa ng pagkaing-dagat. Ito rin ay makulay, nakakapukaw ng pansin at nakakadagdag ng gana sa pagkain. Maaari itong makita sa mga restawran katulad ng Las Paellas Café. Nagkakahalaga ito ng 300-500 piso. Maaari itong ihain sa 2-5 na tao. Pwede rin naman itong gawin sa bahay, upang mas makatipid at makuha ang lasa na nais mo. Isa pang nakakatuwang bagay tungkol sa Paella Marinera ay naglalaman ito ng sustansya. Bagay ito sa mga taong naghahanap o nangangailangan ng mataas na protina. Mayroon din itong mga bitamina, tulad ng Vitamin C at Vitamin B12. Masarap sa pakiramdam sa tuwing ako’y makakakain nito, lalo na kung kasabay ko ang aking mga mahal sa buhay. 

Kung masarap na pagkain ang inyong hanap, matutugunan ng Paella Marinera ang lahat ng inyong inaasahan. Ang bawat sarap ay may katumbas na sustansya at ngiti. Hindi man ito ang pinakamasarap na pagkain sa buong mundo para sa iba, ipinagmamalaki kong ito ay hinahanap-hanap ko.       

- GUENIEVERRE C. TALASTAS