KANIN, KANIN, PABORITO KONG PAGKAIN

 by Lizette A. Vicente

                Ang mga pagkain na ating kinakain ay nagbibigay enerhiya sa ating pang araw-araw na pamumuhay. Kung walang pagkain, paano nalang ang ating pangagatawan? Siguradong tayo ay manghihina at mawawalan ng gana na gawin ang mga nais at kailangan nating gawin. Sigurado ako na lahat tayo ay may kanya kanyang paboritong pagkain na nagbibigay ligaya sa atin tuwing ito’y ating kinakain. Ang isa sa aking mga paboritong pagkain ay ang kanin. Hindi man natin itong matuturing na isang espisipikong pagkain, para sa akin ay pagkain parin ito.

                Lahat naman tayo ay nakakain na ng kanin at alam naman natin na ito ay wala gaanong lasa. Hindi ito matamis, hindi rin naman ito maalat o mapait. Ito ay swak at tamang tama lamang sa ating panlasa. Ngunit, kahit ito ay wala gaanong lasa, ang kanin naman ay napakasustansya parin. Ito ay isa sa mga pinagkukunan natin ng enerhiya o lakas sa katawan, protina, bitamina at marami pang iba. Marami rin tayong magagawa sa kanin. Pwede natin itong gawing, lugaw o sinangag. Maaari tayong mageksperimento upang makuha ang nais nating panlasa para sa ating kanin. Ang kanin ay mula sa bigas at masaya kong masasabi sa inyo na sa napakamurang halaga, makakabili na tayo ng bigas. Ang isang kilo nito ay nagkakahalaga lamang ng bente singko hanggang kwarenta pesos. Maaari tayong makabili nito sa lahat ng pampublikong palengke, grocery o kahit saan mang sari sari store. Masasabi kong paborito ko ang kanin dahil araw-araw akong kumakain ng kanin; mapa-agahan, tanghalian at hapunan. Isang karanasan ko sa kanin ay kapag ako ay kumakain kasama ang aking mga magulang, pinagsasabihan ako ng nanay ko na ubusin ko parati ang aking kanin dahil maraming tao ang hindi nakakakain. At isa pa, sabi sa akin ng kaibigan ko, kung gaano man karami ang natirang butil ng kanin mo, ganoon daw karami ang magiging pimpols mo. Nakakatuwang isipin ang panghuli, pero di natin alam, baka totoo nga.

                Ako ay umaasa na marami na sa atin ang makakahiligan ang pagkain ng kanin. Naniniwala ako na hindi naman ikaw tataba ng sobra sobra pag ika’y kumain ng kanin. Nasa sa tao na iyon kung kaya niyang kontrolin ang paglimita sa pagkain ng kanin. Maisip sana ng mga nagpapayat at hindi kumakain ng kanin na ang hindi pagkain ng kanin ang solusyon para sila ay pumayat. Sa halip, kanila sanang mapagtanto na ang pagkain ng kanin ang magpapalakas, magpapalusog ng kanilang katawan at magpapahaba sa ating buhay.