Corned Beef: Wow ulam na, merienda pa!

        

        

Isang araw, noong ako ay bata pa, nagluto ang aking ina ng sinabaw na baka. Talagang nasabik ako kaya naman umupo na ako sa hapag-kainan kahit hindi pa siya naghahain ng pagkain sa lamesa. Nang natikman ko ang karneng baka na hinalo niya sa sabaw ay nawalan ako ng ganang kumain dahil ito ay matigas at mahirap nguyain. Nagkulong ako sa kwarto noon. Pagkatapos ng ilang oras, pinuntahan niya ako sa kwarto at sinabi niya sa akin na babawi raw siya ngunit hindi na ako naniwala. Pagkapunta ko ng kusina, nakita ko na may ulam na pula. Tinanong ko siya, "Ma, ano ito? Nakakadiri naman. Parang pinunit na laman ng hayop!" Sabi naman niya, "Tikman mo. Hindi ba, sinabi ko sa iyo na babawi ako sa iyo?" Kumuha ako ng kutsara at tinikman ko. Nabatid ko na masarap ito at malinamnam, mabango pa! Dito nagsimula ang lahat, kung bakit naging paborito kong pagkain ang Corned Beef.

Ang Corned Beef ay isang pagkain na maaring ulamin o ipalaman sa tinapay. Ito ay naglalaman ng maraming sustansya na nakakatulong upang tayo ay mabuhay na malusog. Fats ang isa sa mga nutrisyong makukuha sa Corned Beef na isa sa mga pangunahing pinagkukunan ng enerhiya para tayo ay maging masigla. Mayroon din itong Cholesterol. Iniisip ng karamihan na ang Cholesterol ay panira sa ating katawan pero nagkakamali sila! Dapat nating malaman na ang Cholesterol ay tumutulong sa pagpapalinang ng ating memorya at ginagawang waterproof ng cholesterol ang ating cells upang suportahan ang iba't-ibang reaksyon na nangyayari dito. Tumutulong rin ito sa ating mga nerves at muscles na gumana ng maayos.

Alam niyo ba na ang Corned Beef ay bahagi ng tradisyon ng Ireland? Ang Ireland ay isang malaking isla sa bansang Europa na nagdiriwang ng St. Patrick's Day tuwing ika-17 ng Marso. Tradisyon ng mga tao doon na kumain ng corned beef at cabbage bilang bahagi ng kanilang paggunita sa selebrasyong ito. Ginawa nila itong pamalit sa Irish bacon dahil ito ay mas magaan sa bulsa.

Sa ating bansa, ang Corned Beef ay nakalata at mabibili sa halagang dalawampu hanggang dalawampu't limang piso. Ang karaniwang ginagawa nating mga Pilipino ay ginigisa ito sa oil, bawang, at sibuyas, nilalagyan ng asin at pagkatapos ay hinahaluan ng patatas. May isang simpleng paraan upang mas maging masustansya ang corned beef na ating niluluto. Haluan natin ito ng cabbage dahil ang cabbage ay mayroon bitamina C na nagpapalakas ng ating resistensya laban sa sakit at bitamina K na nagpapatibay ng ating mga buto, nagpoproteksyon sa atin mula sa liver cancer at nakakatulong sa paghilom ng mga sugat sa ating katawan o puso.

Ngayong nabatid na niyo ang ilang impormasyon na aking nalalaman tungkol sa Corned beef, sana ay maging inspirasyon ito sa inyo upang tangkilikin ang corned beef. Sa Corned beef, sulit! Mura na, masustansya pa! Ulam na, merienda pa!

-Mary Perl S. Abucejo