Baked Ziti

 

Baked Ziti

  Sa kursong Travel Management, madalas kong marinig na sinasabi ng mga propesor na dapat ay huwag kumain ng madami o di naman ay iwasan ang pagkain ng mga ulam na mamantika o kaya ay mataas sa carbohydrates. Ito siguro ang dahilan kung bakit karamihan sa mga babae na nasa CTHM ay payat at tila pangmodelo ang hubog ng katawan. Sa maniwala man kayo o sa hindi sinusubukan ko din talagang magpigil kumain ng marami, ngunit kapag sila’y nakalapag na sa aking harapan ay tila mayroon silang binubulong sa aking tainga na nagsasabing kailangan ko sila matikman.

  Isa sa mga paborito at malakas na mangakit na pagkain sa akin ay ang “Baked Ziti” o mas kilala sa pangalan na Baked Macaroni. Noong una ko itong matikman ay tila nagningning at naghugis bituin ang aking mata sa sobrang sarap ng Italian dish na ito. Sa katunayan pa nga ay noong gabi din na iyon napanaginipan ko na meron akong hinahabol na isang malaking macaroni at pagkagising ko, hiniling ko na sana macaroni na lang ang matirang ulam sa aming refrigerator. Ito ang naging simula ng pagkahumaling ko sa mga Italian dishes partikular na ang Baked Ziti.

  Tulad ng aking unang nasabi, ang Baked Ziti ay mas kilala sa pangalan na Baked Macaroni. Ang macaroni ay isang uri ng pasta na mayroong iba’t ibang hugis at kulay. Tulad ng kanin isang source ng carbohydrates ang pasta. Ang baked ziti ay puwedeng mahalo sa red sauce o kaya ay sa white sauce. Ang red sauce ay karaniwang yari sa kamatis na alam naman nating lahat ay mayaman sa lycopene na tumutulong upang makaiwas sa sakit sa puso at anumang klase ng kanser. Ang pangalawa naman at ang aking paborito ay ang white sauce.

  Ang Baked Ziti o Baked Macaroni ay maaaring lutuin sa bahay ngunit para sa katulad kong hindi bihasa sa pagluluto ay karaniwan din itong mabibili sa mga establisyemento tulad ng “Greenwich”, “Shakey’s”, “Red Ribbon”, “Goldilocks”, at  ang pinakainirerekomenda ko sa lahat ay ang “Sbarro”. Sa halagang php95 ay matitikman mo na ang malinamnam na Italian dish na ito na mayroong garlic bread sa tabi, samahan mo pa ng isang hati ng white pizza nila na nagkakahalaga naman php86 at para sa panulak ay maaari kang humingi na lamang ng mineral water para makatipid o kaya kung nahihiya ka naman ay bumili na lamang.

-Grethel Catrina R. Madrid